19 Авг Ініцыятыва “Кабылякі. Расстраляныя ў Воршы” заняла другое месца
Грамадская ініцыятыва “Кабылякі. Расстраляный ў Воршы” узяла ўдзел у першым рэгіянальным Фэсце грамадскай актыўнасці і атрымала 2-е прызавое месца за дзейнасць па ушанаванні памяці ахвяраў сталінскіх рэпрэсій.
На імпрэзе, падрыхтаванай аршанскім моладзевым аб’яднаннем “Звяз”, пра сваю дзейнасць распавялі прадстаўнікі розных гарадскіх суполак і грамадскіх ініцыятываў. Яны падрыхтавалі прэзентацыі, фотавыставы, падзяліліся аповедамі пра свае дасягненні з гасцямі фэсту. А журы вызначыла пераможцаў. Вартых уганаравання аказалася шмат, і традыцыйных трох прызавых месцаў проста не хапіла, распавёў кіраўнік “Звязу” Ігар Казмярчак: – З дзесяці арганізацыяў павінна было быць вызначана тры найбольш актыўных. А вызначылася пяць. Мы так не прадугледжвалі, але журы вырашыла, што другая і трэцяя прэміі павінны быць падзеленыя.
Першае месца атрымала аршанская суполка Таварыства беларускай мовы, яны вельмі актыўна працавалі ў гэтым годзе. Другое месца было прысуджана вядомай ініцыятыве “Кабылякі. Расстраляныя ў Воршы”, якая аб’ядноўвае нашчадкаў ахвяр сталінскіх рэпрэсій, і зусім маладая ініцыятыва “Хвосцікі”, удзельнікі якой дапамагаюць беспрытульным жывёлам. Трэцяе месца падзялілі аршанская суполка прафсаюзу РЭП і экалагічна-культурніцкая ініцыятыва “Чысты свет”.
Тое, што ў ліку пераможцаў апынуліся прадстаўнікі абсалютна розных накірункаў грамадскай дзейнасці, павінна пайсці на карысць далейшаму развіццю, лічыць кіраўнік суполкі Таварыства беларускай мовы Юрый Нагорны: – Заўсёды нармальна, калі ёсць канкурэнцыя. Было вельмі прыемна паглядзець, як арганізацыі стараліся, рыхтаваліся, колькі тут стэндаў, колькі людзей перазнаёміліся! Усё гэта спрыяе нашай актыўнасці, нашай культуры, агульначалавечай. І прыемна, што далучаецца моладзь, бо за ёй – будучыня.
Фэст грамадскай актыўнасці прайшоў на аграсядзібе “Пуцяціна” ў вёсцы Стаўры Аршанскага раёну. Такая імпрэза адбылася ўпершыню, але цалкам верагодна, што яна стане традыцыйнай.
На фота нашчадкі расстраляных і актывісты грамадзянскай ініцыятывы “Кабылякі. Расстраляныя ў Воршы” (справа налева) Станіслаў Лазоўскі, Таццяна Кучынская, Аляксандр Разумны, Ларыса Арэшына, Ігар Станкевіч